Həmişə müasir 103 yaşlı teatr

Yola saldığımız 2012-2013-ci il teatr mövsümü Azərbaycan Dövlət Musiqili Komediya Teatrı üçün bir sıra önəmli hadisələrlə yadda qaldı.

Respublika Prezidentinin 25 noyabr 2010-cu il tarixli sərəncamı ilə Azərbaycan Dövlət Musiqili Komediya Teatrında aparılan təmir işləri başa çatdı, ölkə başçısının iştirakı ilə açılış mərasimi oldu. Bu gün Azərbaycan Dövlət Musiqili Komediya Teatrı inkişaf mərhələsini yaşıyır. Teatrda dövlət islahatlarına uyğun olaraq yüksək mənəvi-milli dəyərlərə söykənən repertuar formalaşır və bu iş davam etməkdədir. İndi teatrın repertuarında tamaşaçılar tərəfindən sevilən onlarla maraqlı səhnə əsəri var. Bundan əlavə, teatr müxtəlif beynəlxalq festivallarında iştirak edir. Görülən işlər aktyorların, rejissorların, ümumilikdə teatrın inkişafına böyük dəstəkdir. Ötən dövr ərzində bir neçə yeni tamaşa hazırlanıb təhvil verilib, bir neçə yeni əsər isə məşq prosesindədir. Qastrol səfərləri, yeni tamaşalar öz axarı ilə davam etməkdədir.

Bu mövsümdə teatrın kollektivi bir-birindən maraqlı layihələrə imza atıb, yeni-yeni premyeralarla tamaşaçılarını sevindirib. 2012-ci il may ayının 21-də tanınmış bəstəkar Emin Sabitoğlunun «On min dollarlıq kef» (libretto müəllifi C.Məmmədov) musiqili komediyasını təqdim edən kollektiv bir qədər sonra Mədəniyyət və Turizm Nazirliyinin sifarişi ilə Azərbaycan dramaturgiyasının banisi Mirzə Fətəli Axundzadənin 200 illik yubileyi münasibətilə ədibin «Hekayəti Molla İbrahimxəlil Kimyagər» komediyası əsasında hazırlanmış «Kimyagər» (bəstəkar Siyavuş Kərimi, liberetto müəllifi Əjdər Ol) tamaşası ilə sənətsevərlərin görüşünə gəldi. Tamaşa Respublikası Mədəniyyət və Turizm Nazirliyinin keçirdiyi «Sərgüzəşti- Mirzə Fətəli Axundzadə» Milli Teatr Festivalı çərçivəsində iyun ayının 8-də Akademik Milli Dram Teatrında göstərildi (quruluşçu rejissor əməkdar incəsənət xadimi Bəhram Osmanov).

2013-cü il yanvar ayının 22-də Azərbaycan Dövlət Musiqili Komediya Teatrının kollektivi yeni ilin ilk premyerasını təqdim etdi. Teatr bu dəfə Fransa və Qərbi Avropa ədəbiyyatında klassik komediya janrının banisi J.B.Molyerin «Skapenin kələkləri» (quruluşçu rejissor əməkdar incəsənət xadimi Əsgər Əsgərov) komediyasını nümayiş etdirdi. Onu da qeyd edək ki, bu komediya böyük dramaturq J.B.Molyerin Musiqili Komediya Teatrının səhnəsində oynanılan ilk əsəri idi.

Uğurla səhnəyə qoyulan tamaşalardan biri də görkəmli dramaturq Ə.Haqverdiyevin «Kimdir müqəssir?» pyesi əsasında hazırlanan tamaşa oldu. Janrı ilahi komediya kimi müəyyən olunan tamaşanın quruluşçusu gənc və istedadlı rejissor İradə Gözəlova, rəssamı Nabat Səmədovadır. Tamaşada rəqslərə xalq artisti Təranə Muradova və Qalina Semyonova quruluş vermişdir.

Bu mövsümdə kollektiv, həmçininin, SSRİ xalq artisti, görkəmli bəstəkar Rauf Hacıyevin 90 illik yubileyi münasibəti ilə (may ayının 15-də) mərhum sənətkarın şərəfinə onun müəllifi olduğu «Talelər qovuşanda» tamaşasını bərpa edərək yenidən tamaşaçılara təqdim etdi.

Azərbaycan Dövlət Musiqili Komediya Teatrı zaman-zaman təhsil müəssisələri ilə müxtəlif layihələr həyata keçirir. Bunlardan biri də teatr kollektivinin Milli Teatrın 140 illiyi münasibəti ilə “Bakı Modern School”da həyata keçirdiyi tədbiridir. Teatrın rus bölməsində hazırlanan “Skapenin kələkləri” (J.B.Molyer) tamaşasının yaradıcı heyəti ilə görüş qismində hazırlanmış tədbirin əsas məqsədi gənclərdə teatra olan marağı artırmaq, istedadlı gəncləri teatra cəlb etmək və onlara teatr sənətinin incəliklərini çatdırmaqdır.

Teatrın Yaradıcılıq Studiyası da il ərzində yenilikləri ilə tamaşaçılarını sevindirmişdir. Qeyd edək ki, Yaradıcılıq Studiyası müxtəlif ölkələrdə keçirilən bir sıra nüfuzlu festivalların, müsabiqələrin iştirakçısı olmuş, həmişə də vətənə yüksək mükafatlarla qayıtmışdır. Balaca artistlər 2006-ci ildən mütəmadi olaraq Turkiyənin TRT kanalının dəvəti ilə 23 Nisan Beynəlxalq Uşaq Festivalında çıxış edərək, bütün dünyaya Azərbaycan mədəniyyətini, incəsənətini nümayiş etdirmiş, Türkiyə Cümhuriyyətinin Prezidenti və Baş Naziri ilə təşkil olunmuş rəsmi görüşlərin iştirakçısı olmuşlar.

Ötən il Amsterdamda keçirilən «Junior Eurovision 2012» müsabiqəsində də vətənimizi Musiqili Komediya Teatrının Yaradıcılıq studiyasının üzvləri təmsil etmişlər.

Hər il mütəmadi olaraq 1 İyun - Beynəlxalq Uşaqları Müdafiə Günündə həmyaşıdlarını sevindirən balaca artistlər bu il də onlar üçün təntənəli bayram şənliyi təşkil etmiş və teatrın səhnəsində ilk dəfə olaraq Azərbaycan dilində «Düyməcik» (Hans Xristian Anderson, quruluşçu rejissor Elməddin Dadaşov) tamaşasını nümayiş etdirmişdir.

Hələ bu ilin əvvəlində kollektiv teatrın heyətində əsaslı dəyişikliklər etmək üçün müsabiqə elan etmiş, teatrda həm aktyor, həm də orkestr, xor və balet heyətlərinin tərkibi möhkəmləndirilmiş, yeni gənc və istedadlı kadrlar teatra cəlb olunmuş, cari repertuar zənginləşdirilirmişdir.

Göründüyü kimi, 2012-2013-cu il tear mövsümü bir sıra çətinliklərə baxmayaraq Azərbaycan Dövlət Musiqili Komediya Teatrı üçün çox fərqli və uğurlu olmuşdur.

Teatrın kollektivi qarşıdan gələn yeni teatr mövsümündə də tamaşaçılarını yeni tamaşalarla sevindirmək niyyətindədir. Gələn mövsüm üçün teatrın repertuarına daxil edilən «Qızıl toy» (O.Kazımi, R.Heydər), «Arşın mal alan» (Ü.Hacıbəyli), «Silva» (İ.Kalman) kimi tamaşalar yeni mövsümdə teatrsevərlərin ixtiyarına veriləcək.

Artıq teatrın binasında aparılan təmir-bərpa və yenidənqurma işləri başa çatmış və kollektivin yenidən teatra köçürülməsi üçün hazırlıq prosesinə başlanılmışdır.

Bizə isə 103 yaşlı qocaman teatrımızın gənc və işgüzar kollektivinə uğurlar, yeni tamaşaların sevincini çatdıran bol tamaşaçı alqışı arzulamaq, uğurlu səfərlərdən və tamaşalardan sonra görüşərik demək qalır.

Vəfa Mühacirova,

Teatrşünas

Kaspi.-2013.-8-10 iyun.-S.12.